Sunday, May 15, 2011

പൃഥ്വിരാജോ? അതൊന്നും എനിക്ക് പ്രശ്നമല്ല: സംവൃത



പൃഥ്വിരാജിനെയും തന്നെയും ചേര്‍ത്ത് പരക്കുന്ന ഗോസിപ്പുകളെ കാര്യമാക്കുന്നില്ലെന്ന് നടി സംവൃതാ സുനില്‍. അത്തരം ഗോസിപ്പുകള്‍ക്കൊന്നും വലിയ പ്രാധാന്യം നല്‍കുന്നില്ലെന്നും സംവൃത പറഞ്ഞു. ഒരു വനിതാ പ്രസിദ്ധീകരണത്തിനനുവദിച്ച അഭിമുഖത്തിലാണ് സംവൃത ഇക്കാര്യം പറയുന്നത്.

“ഗോസിപ്പു വാര്‍ത്തകളൊക്കെ ശ്രദ്ധിച്ചുകൊണ്ടിരുന്നാല്‍ സിനിമയില്‍ അഭിനയിക്കാന്‍ പറ്റുമോ? ഇതൊക്കെ ഈ ജോലിയുടെ ഭാഗമാണ്. അതുകൊണ്ട് അത്ര പ്രാധാന്യമേ ഞാന്‍ നല്‍കുന്നുള്ളൂ. ഒരു ചെവിയിലൂടെ കേട്ട് മറ്റേ ചെവിയിലൂടെ കളയും. അത്രതന്നെ” - സംവൃത വ്യക്തമാക്കുന്നു.

‘രസികന്‍’ എന്ന ചിത്രത്തിലെ നായികയായി സിനിമാലോകത്തേക്കെത്തുമ്പോള്‍ ഒരു ‘പാവം കുട്ടി’യായിരുന്നു സംവൃത. ഇപ്പോഴും പാവം കുട്ടി തന്നെ. എങ്കിലും ചോദ്യങ്ങള്‍ക്കൊക്കെ വളരെ ആലോചിച്ചുറപ്പിച്ച മറുപടി. തീരുമാനങ്ങളില്‍ കൃത്യത.

“വിവാഹം കഴിക്കുന്ന ആളെക്കുറിച്ച് ഞാന്‍ സ്വപ്നം കണ്ടിട്ടില്ല. ശരിയായ ആളെക്കാണുമ്പോള്‍ ഇതാണെന്‍റെ ആള്‍ എന്ന് മനസു പറയും എന്നാണ് വിശ്വാസം. ഈ നാട്ടുകാരന്‍ വേണം, ഈ ജോലിക്കാരന്‍ വേണം ഇങ്ങനെയൊക്കെ ചിന്തിക്കുന്നതില്‍ അര്‍ത്ഥമൊന്നുമില്ല. പരസ്പരം മനസിലാക്കുക എന്നതിലാണ് കാര്യം. എനിക്ക് പ്രണയവിവാഹത്തോട് താല്‍പ്പര്യക്കുറവൊന്നുമില്ല. എങ്കിലും ഒരാളെ പ്രണയിച്ചു മനസിലാക്കി വിവാഹം കഴിക്കാന്‍ കുറച്ചു സമയം വേണ്ടേ?എന്‍റെ സ്വഭാവം അനുസരിച്ച് അറേഞ്ച്ഡ് മാര്യേജ് ആകാനാണ് സാധ്യത” - സംവൃത പറയുന്നു.

വിവാഹത്തിനു ശേഷം സിനിമയോട് ഗുഡ്ബൈ പറയില്ലെന്നും സിനിമയ്ക്ക് തന്നെ ആവശ്യമുള്ളിടത്തോളം താന്‍ സിനിമയിലുണ്ടാകുമെന്നും സംവൃത ഉറപ്പുനല്‍കുന്നു.